9. apríl 2025

Samstarf og sjálfbærni í Sligo – Upphaf Nordic Bridge verkefnisins

 Nýtt evrópskt samstarf um nýsköpun og þekkingarmiðlun

Í síðustu viku var haldinn upphafsfundur nýs verkefnis á vegum Northern Periphery and Arctic (NPA) áætlunarinnar – Nordic Bridge – í borginni Sligo á Írlandi. Fundurinn var haldinn í Atlantic Technological University (ATU), þar sem um 10.000 nemendur stunda nám, og markaði formlegt upphaf þessa metnaðarfulla verkefnis.



Nordic Bridge miðar að því að efla tengsl milli háskólasamfélags, atvinnulífs og nærsamfélaga til að styðja við nýsköpun og sjálfbæra þróun á norðlægum svæðum. Eimur tekur þátt sem stuðningsaðili (e. associated partner), og fór Kolfinna María, markaðs- og nýsköpunarstjóri Eims, á fundinn ásamt samstarfsaðilum frá Íslandi, Noregi, Finnlandi og Írlandi. Meðal íslenskra þátttakenda eru SSNE og Háskólinn á Hólum.


Markmið Nordic Bridge er að bregðast við þeim áskorunum sem svæðin standa frammi fyrir – til að mynda skorti á samstarfi milli fræðasamfélags og atvinnulífs og vannýttum tækifærum til rannsóknar og þróunar. Kjarni verkefnisins felst í smíði stafræns samstarfsvettvangs þar sem opinberir aðilar, fyrirtæki og stofnanir geta sett fram áskoranir, markmið og raunveruleg verkefni sem rannsakendur og nemendur geta tekið þátt í að leysa – meðal annars með lokaverkefnum í samstarfi við stofnanir og fyrirtæki innan verkefnisins.

Nordic Bridge mun jafnframt styðja við alþjóðlegt rannsóknasamstarf milli háskóla í þátttökulöndum, sem gerir nemendum kleift að vinna að verkefnum yfir landamæri og takast á við raunverulegar áskoranir annars staðar á Norðurslóðum.

Ferðin til Sligo var afar vel heppnuð. Gestgjafar ATU tóku hlýlega á móti hópnum og buðu upp á áhugaverða kynningu á starfsemi og framtíðarsýn skólans, auk leiðsagnar um háskólasvæðið þar sem við fengum innsýn í fjölbreytt og öflugt skólastarf.


Þá heimsótti hópurinn einnig AIM Centre (Advancing Innovation in Manufacturing), nýja nýsköpunar- og rannsóknarmiðstöð á svæðinu sem tengir saman rannsóknir og atvinnulíf – og Future Cast, þar sem nýsköpun og sjálfbærar lausnir í byggingariðnaði eru í forgrunni. 


Eimur þakkar AIM Centre og öðrum skipuleggjendum fundarins kærlega fyrir vel skipulagða dagskrá og hlýjar móttökur í fallega bænum Sligo.

Kolfinna María hjá Eimi og Anna Lind hjá SSNE sóttu fundinn í Sligo

Button

Hópurinn heimsótti m.a. Future Cast sem sem 3d prentar steypu m.a. úr affalsefni frá byggingariðnaði

Button

Deila frétt

Skráning hafin á Akureyri Energy Seminar í Hofi

Eftir Kolfinna María Níelsdóttir • 10. apríl 2025
RECET verkefnið og Net Zero Islands Network standa fyrir þessum viðburði, þar sem sérfræðingar, stefnumótendur og hagsmunaaðilar koma saman til að ræða og stuðla að orkuskiptum á eyjum og í dreifðum byggðum. Ráðstefnan er einstakt tækifæri til að miðla þekkingu, skoða nýjar lausnir og efla tengslanet. Dagskráin samanstendur af framsöguerindum og umræðum sem miða að því að styðja við sjálfbæra þróun og grænna samfélag. Ókeypis er á ráðstefnuna sem fer einnig fram í streymi - skráning fer fram hér: https://www.recetproject.eu/events/akureyrienergyseminar Um RECET: RECET (Rural Europe for the Clean Energy Transition) er samstarfsverkefni fimm landa og tuga sveitarfélaga um alla Evrópu, með Ísland í fararbroddi. Verkefnið miðar að því að efla getu sveitarfélaga í dreifðum byggðum í Evrópu og atvinnulífsins til að takast á við orkuskipti og smíða orkuskiptaáætlanir fyrir svæðin. RECET er styrkt af LIFE styrktaráætlun Evrópusambandsins sem leggur áherslu á umhverfis- og loftslagsmál. Um Net Zero Islands Network: Net Zero Islands Network gegnir lykilhlutverki í þróun grænna og sjálfbærra orkulausna fyrir eyjar og afskekkt svæði. Markmið netsins er meðal annars að auðvelda miðlun þekkingar milli eyja og afskekktra svæða, skapa fleiri atvinnutækifæri og kanna möguleika á kolefnisneikvæðum lausnum. Norræna orkurannsóknarstofnunin (Nordic Energy Research) hefur umsjón með verkefninu. 

Frábær þátttaka á upphafsfundi ICEWATER

2. apríl 2025
Um 80 manns tóku þátt í fyrsta fundi í ICEWATER verkefninu, sem haldinn var dagana 24. og 25. mars 2025 í húsnæði Orkuveitu Reykjavíkur í Elliðaárdalnum. Fundurinn markaði upphaf þessa metnaðarfulla verkefnis, sem miðar að því að flýta fyrir og bæta innleiðingu vatnaáætlunar á Íslandi.

Vefþing um orkuskipti smábáta í sjávarútvegi

Eftir Kolfinna María Níelsdóttir • 21. mars 2025
Eimur og Vestfjarðastofa bjóða til vefþings, fimmtudaginn 3. apríl næstkomandi, þar sem fjallað verður um áskoranir og tækifæri við orkuskipti smábátaflotans. Hvað þarf til að orkuskipti smábáta verði að veruleika? Hvaða endurnýjanlegu orkugjafar verða í boði til notkunar á sjó? Hvaða reglur um haffærni rafmagnsbáta munu gilda? Sérfræðingar, hagsmunaaðilar og sjómenn munu ræða þessi og önnur mikilvæg mál eins og kostnað, hreinorkuívilnanir og áhrif breytinganna á byggðaþróun og samfélag. Þátttaka er öllum opin en til að fá fundarboð þarf að skrá sig. Smelltu hér til að skrá þig Dagskrá *Birt með fyrirvara um breytingar Hluti I: Tæknilausnir í farvatninu 13:00 – „Stefna stjórnvalda og orkuskipti smábáta“, Jóhann Páll Jóhannsson, Umhverfis-, orku- og loftlagsráðherra. 13:20 – „Rafmagns og tengiltvinnlausnir í smábátum”, Kolbeinn Óttarsson Proppé, stofnandi Grænafls. 13:40 – „Nýsmíði rafmagnsbáta,tækifæri og áskoranir“, Jónas Ingi Pétursson, Þrym. 14:00 – „Takmarkandi þættir þegar kemur að orkuskiptum smábáta”, Tinna Rún Snorradóttir, rannsókna- og þróunarstjóri Bláma. Kaffihlé – 10 mín Hluti II: Samfélag og orkuskipti smábáta 14.30 – „Öryggiskröfur rafbáta og leyfismál þeirra“, Ingólfur Örn Þorbjörnsson, sérfræðingur á Samgöngustofu. 14.50 – „Áskoranir fyrir hafnir vegna orkuskipta smábáta“, Gyða Mjöll Ingólfsdóttir, umhverfisstjóri Faxaflóahafna. 15:10 – „Orkuskipti smábáta út frá sjónarhóli smábátasjómanna“, Einar Helgason, formaður félags strandveiðisjómann á sunnanverðum Vestfjörðum. 15:30 – „Líklegar/hugsanlegar breytingar á Byggðamynstri samfara orkuskiptum í sjávarútvegi“, Dr. Catherine Chambers, rannsóknarstjóri hjá Stofnun Vilhjálms Stefánssonar. 15:50 - 16:10 - Pallborðsumræður fyrirlesara undir stjórn Ottós Elíassonar, framkvæmdastjóra hjá Eimi.